Bağdadi Kureyştenmi

Əbu Bəkir əl-Bağdadinin "soy silsiləsi"

İŞİD tərəfindən dünya müsəlmanlarına təqdim edilmiş Əbu Bəkir əl-Bağdadinin soy silsiləsi haqqında məlumat bu təşkilatı dəstəkləyən informasiya vasitələri tərəfindən geniş şəkildə yayınlanıb. Burada Əbu Bəkir əl-Bağdadinin Qureyşdən olduğu və ALLAH Rəsulunun (صَلَّى اللَّهُ عَلَيْهِ وَسَلَّمَ) nəslindən olduğu iddia edilir:

Həmçinin azərbaycan dilində vikipediyada, qrammatik səhvlərlə dolu olsa belə, bu haqda məqalə yerləşdirilmişdir:

Əlbəttə ki, İŞİD-in daxilində olan insanlar üçün bu məlumatı "həzm etməkdə" heç bir problem yoxdur. "Əmirəlmömininə" necə şəkk etmək olar? Əl-Bağdadi, əl-Ədnani, İŞİD-medyaları "satılmış islam alimlərindən" deyil ki, onların sözləri şübhə altına alınsın?

Amma "təəssüf" ki, dünya müsəlmanları arasında İŞİD-in yaydığı məlumatlara hələ də inanmayanlar var. Və bu müsəlmanlar nəinki onlara etimad göstərmirlər, hətta lazım gəldikdə yaydığı məlumatları analiz edib yalanlarını üzə də çıxarırlar.

Beləliklə, gəlin bu "soy silsiləsinə" nəzər salaq. İlk olaraq onu qeyd etmək lazimdir ki, ALLAH Rəsulu Muhəmməddən (صَلَّى اللَّهُ عَلَيْهِ وَسَلَّمَ) Əli ibn Muhəmməd əl-Hədiyə qədər bu siyahı 10 nəsil ard-arda tam olaraq şiələrin "imamət" silsiləsini təkrarlayır. Sünnü lideri, "xəlifə" üçün çox maraqlı bir faktdır, elə deyil mi?

!!!

Biz burada həmin imamların həqiqətdə şiə və ya sünnü olduğundan söhbət açmırıq. Və xahiş olunur bunu diqqətlə oxuyasız və belə anlamayasız ki, biz ALLAH Rəsulunun (صلى الله عليه و سلام) əhli-beytinə hörmətsizlik etmək istəyirik, eləcə də başqa bu kimi fikirlərə düşməyəsiz. Yox, biz yalnız onu qeyd etmək istəyirik ki, Əbu Bəkr əl-Bağdadi şiələrin "imamət" silsiləsiylə dünyaya gəldiyini iddia edir.

Nəzərə alsaq ki, nə Qur`anda, nə də Sünnədə, hətta zəif hədislərdə belə, bu "imamət silsiləsi" zikr edilməmişdir, 10 (!) nəsil ard-arda şiələrin bu "imamlarını" təkrarlamağa nə ad qoymaq olar? Yoxsa şiələrdə "kəramət" olduğunu qəbul edək? - Qur`anda və Sünnədə belə məlumat olmadığı halda bu silsiləylə müsəlmanların "xəlifəsi" gələcəyini neçə əsr öncə iddia etdilər və "doğru" çıxdılar.

İndi isə bu "soy silsiləsinə" yenidən nəzər salaq:

Göstərildiyi kimi, Əli əl-Hədi daxil olmaqla bu silsilənin əvvəlindəki şəxslər tarixdə məlum olan adamlardı. İmam əz-Zəhəbi "Əs-Siyər" adlı kitabında bunların hamısı haqda yazır (13/120-121) və hər biri haqda müsbət sözlər söyləyir. Əli əl-Hədi miladi təqvimlə 868-ci ildə dünyasını dəyişib. Məlumdur ki, onun 3 oğlu olub: Həsən (şiələr onu "11-ci imam" hesab edirlər), Muhəmməd Əbu Cəfər (atasından bir neçə il öncə vəfat edib) və Hüseyn. Beləlikə, Cəfər əz-Zəki adlı şəxsi biz Əli əl-Hədinin oğulları arasında tapa bilmirik. Eləcə də sonrakı adamlar haqda islam tarixində heç bir məlumat yoxdur. Orta yaş fərqi isə gördüyünüz kimi 26-28 ildən (bu normal rəqəmdi) birdən-birə 54-55 ilə qalxır (hər kəs öz atasıyla və yaxud övladlariyla yaş fərqinə baxsa anlayar ki, bu qeyri-adi bir rəqəmdi və 20-21 nəsildə ard-arda rast gələ bilməz).

Beləliklə, İŞİD-in təqdim etdiyi bu "soy silsiləsi" nə tarixlə, nə elementar riyaziyyatla, nə də - şiələrin "hədislərinə" və "kəramətli təsadüflərinə" inanmayanlar üçün - reallıq baxımından normal Əhli-Sünnət inancıyla düz gəlmir. Bəs bu qədər müsəlmanlara bu yalanı sataraq onların başları üstündə bu "xəlifə" və "xilafət" adlı oyunu qurmaq, dünyada bütün camaatları batil elan etmək, onlarla vuruşmaq, təkfir etmək, oldürmək, islam ümmətini dəhşətli bir fitnəyə salmaq - kimlərin marağına xidmət edir?.. Cavabını siz verin.